TREINAMENTU LORON IDA KONABA MORAS HIV/AIDS

KOMUNIDADE SUB DISTRITO NATARBORA SUKU UMA-BOCO ALDEIA AIMETA-LARAN MENUS INFORMASAUN KONA-BA MORAS HIV/AIDS

Iha Loron Sabadu (11/02/2012), Organizasaun  Fundasaun Sai Inovasaun ba Komunidade (F-SIK) ho inisiativa boot hakarak hatutan informasaun  ba Komunidade, Joventude, no Estudante sira  iha area rurais liliu iha Aldeia Aimeta Laran, Suku Uma-Boco, Sub-Distritu Natarbora,  Distritu Manatuto tanba iha area refere falta no menus tebes informasaun kona-ba moras HIV/AIDS ne’ebé  agora dadaun buras iha nasaun iha Timor-Leste.

Manuel Boavida reprezenta F-SIK ne’ebé sai orador ba atividade refere hateten katak moras HIV/SIDA moras ne’e perigu tebes ba ema nia vida. Moras ne’e daet liu husi relasaun seksual, tato, tranfunsaun ran no lamina.

Nia hatutan liutan katak moras ne’e sei ladaet liu husi toba hamutuk, hariis hamutuk no reí malu.

Tuir data statistik Ministériu Saúde ema nain 238 mak hetan moras HIV/SIDA no mate ona ema nain 23, informa Manuel Boavida.

Nia salienta liutan katak Moras HIV/SIDA laiha aimoruk atu kura maibé so iha deit aimoruk ida naran ARV (Anti Retroviral) atu hanaruk ema nia vida de’it.

“tuir istória katak iha ema matenek nain sira nia peskiza moras HIV/SIDA hahu mosu husi ema kulit metan (Afrikanu) iha tinan 1981 no tama iha Nasaun TLS iha tinan 2003”

Iha moto ida hatete nune’e HIV/SIDA katak “Hau Iha Vida-Hau Iha Valor” signifika katak oinsa hau atu hakdo’ok aan no prevene aan husi moras HIV/SIDA” hateten Manuel.

Xefi sentru Saúde Natarbora, Casimiro Gomes katak”oinsa atu uja kondom bainhira iha relasaun seksual, liu husi informasaun ida ne’e laos atu influenza imi nia hanoin maibé oinsa atu halo prevenesaun ba moras ida ne’ebé prigozu ba ema nia vida. ”hateten Gomes.

Iha introdusaun ba treinamentu Moras HIV/SIDA ne’e husi Koordenador F-SIK, Miguel Nunes hateten “Hau  reprezentante kolega hotu  ba komunidade Jovetude no estudante sira katak F-SIK  hari’imai husi inisiativa estudante Ensino Superior ne’ebé estuda iha kapital DILI. Atividade ne’e realiza tanba hetan apoiu husi CWS” hateten Nunes.